Хөгшин үнээний үг
By oyuna / July 31, 2019 / Веган амьдралын хэв маяг / 1 CommentБадарчин Гомбодорж
Хөгшин үнээний үг
Эрлэгийн гарт идшинд баригдан
Эцэж ядарсан хөгшин үнээний
Энэлэн гаслан орилон бахирч
Элдвийг хэлсэн үгийг сонс
Эрт цагт эхээс гарснаас хойш
Эвэр туурай ургаж өссөөр байлаа
Элдэв олон ижилтэй цэнгэн жаргалаа
Энхрий хайрт үр олон боллоо
Шимээ хүртээж төлөө ч өглөө
Шижир алт шиг хайрладаг ч байлаа
Эрх дураар бэлчдэг ч байлаа
Энх сайхан жаргадаг ч байлаа
Цаг үе ч өнгөрсөөр л байлаа
Цагаан сүү минь ч ховордож ирлээ
Өсөж үржих ч цөөн боллоо
Өвс хазах шүд ч болилоо
Эвэр туурай ч мохож муудлаа
Энэ тэр ч дээрэлхэх боллоо
Эзэн хүн ч шийд гаргалаа
Эрчит дээсээр ч намайг хүллээ
Энэ мэт болохыг нь мэдсэн ч болоосой
Эл хул газарт явсан ч болоосой
Эрэг доогуур шургасан ч болоосой
Элгэн хаданд авирсан ч болоосой
Эзэнгүй гөрөөс шиг эрхтэй ч болоосой
Эвдрэхгүй мөнх биетэй ч болоосой
Эсэргүүцэн заалдах газартай ч болоосой
Элээ халаг!!!
Би яая даа!!!
Элдвээр хуурах арга ихтэй
Элдвээр зовоох хутга сүхтэй
Эрлэг яргачдын атган дороос
Эсэн мэнд гарах нь өнгөрчээ
Иртэй хутга нь эмтэрдэг ч болоосой
Иштэй сүх нь хугардаг ч болоосой
Итгэлтэй хүлэг нь тасардаг ч болоосой
Ивэрч цөмрөөд унадаг ч болоосой
Ижил олон өмгөөлдөг ч болоосой
Идэгч эрлэгээс авардаг ч болоосой
Элээ халаг!!!
Би дууслаа!!!
Элэг зүрх чичрэн шимширнэ
Энд тэндгүй шархиран өвдөнө
Эрхтэн бүхэн балайран мятарна
Эвэрт толгой манаран дүйрнэ
Энэ тэр эрээлжлэн бүүдийлээ
Элдэв нөхцлөөр би ийм боллоо
Энэ мэтээр үглэн мөөрлөө
Эргэцүүлэн бодогч ховор биз дээ
Энэнээс хожим эгэл биеийг
Эгнэгт тэвчин эрдэнийн биеийг
Эндэлгүй олохыг эрхэм болгоё гээд
Ээ гэж орилон эргэлдэж унажээ
Идэх дуртай эзэн хүмүүс
Ирт шүдээ ярзайн инээж
Идүүр тэвшээ бэлдэн авчирж
Ийш тийшээ тарааж түгээнэ
Газар холыг тойрон тэнэгч
Ганц дан бадарч Гомдорж
Ганц үнээний гаслант үгийг
Гансрах сэтгэлээр гаргаж хэлэв
Гартаа малтай олон хүмүүс
Гарз олзыг сонгон бодож
Гамнан хайрлаж хэмнэн хэрэглээд
Ганц хоёрыг ч болов аврах болтугай.
Алтан хүрдэн судраас. 1832 он
Шинэ цагийн хүнс ургамал хоолны гайхамшиг номноос авав.
Бодууштай шүлэг байна шүү. Хүмүүс өөрсдөн дээрээ төсөөлөн бодоосой.